Un’aghju avutu u piacè di fà a vostra cuniscenza che per via di L’Annu Corsu e di certi articuli scritti da voi in lu Petit Marseillais ; ma mi basta per ghjudicà in la vostra simpatica persona un giovanu di talentu, pienu d’un amore prufondu e dilicatu pe u so’ paese nativu, tagliatu per direge i boni muvimenti suciali, e capace di dà à la nostra cara Corsica l’impulsu pe’ u so’ risurgimentu.
Mi scusarete d’esse cusì francu perchè un si loda mai abbastanza un’ omu chi, cume voi, mette e so’ richezze intellettuali à u serviziu di u paese ; quand’ ellu si purebbe cuntità di gode, cume altri, d’una vita d’onore, e di dulcezza materiali.
Ghj’è un gran piccatu che voi un possate esse in cuntattu più ristrettu cu e nostre pupulazioni, perchi, un c’è à dî, per ottene da i nostri paisani a vulinta d’azione e di fede in l’avvenire ci vole à spiegalli u passatu, a riscaldalli cu a fiaccula di a bona parolla, lanciata à bocca da Apostuli di a vostra tempera !… – I discepuli di a duttrina patriottica un mancarebbenu ; certi d’elli hanu digià alzatu a torchia accesa sopra e tenebre duve noi languimu dipoi Ponte-Novu. Si i critti sô utilissimi, un bastanu più per risviglià u corpu suciale corsu, smurtitu da i strazi in l’inviluppu putridu di a turba pulitica. Ci vole predighe infiarate da nantu à u pulpitru di a fede e di e rivendicazione ; mustrà l’errori in famiglia, e a manera di rimedialli ; scopre u male e metteci u ferru rossu di a purificazione ; dinunzià e cause, pruclamà i nostri diritti ed imponeci u duvere di falli valè, per mezzi pacifichi, si, ma energichi.
Basta un’ omu per fanne centu ! e’ si centu, per fà un paese, una nazione ! Dicendu cusi pensu à u nôstru parente di sangue, Napulione.
Sentu chi a Terra di Cumune resta più che l’altre partite di l’isula, smurtita da i fulmini passati. Un c’è che u Di-là chi cumencia à movesi. E a sera mi ne stô suvente pinsosu, l’occhj à u celu mezzu schjaritu, guardendu cu dolce emuzione a stella Venere, chi luce versu u Pumonte cume un segnu di spiranza…
par 
