par Avà la Petra respira,
Di speranza digià piena.
Spera, cu lu nôvu mere,
Di vede cambia la scena
Duv’ella patia doma
Da la frusta e catena
Perchi tutte le so piaghe
Li sianu megliurate
Spera chi lu nôvu mere
Li derà ben applicate
Subitu le medicine
Ch’ellu dice preparate
Prima, di li paisani
Serà fatta l’unione,
Pe’ l’interessu cumunu
Ne vullerà lu stampone
E mai per inghiustizia
Da l’ira si porà pone !
Cum’ una casa di vetru
Serà la nostra merìa,
Di manera chi da fôra
Ogni facenda ne sia
Cusi chiaramente vista
Chi mancu dubbiu ci stia.
A tutti sterà aperta ;
Sempre ogni paisanu
Serà d’amore servitu
Cor’ apertu, sporta manu,
Chi quessa, ne simu certi,
La vorà lu Capitanu.
Ellu cu stessa bilancia
Piserà ogni devutu ;
A quellu chi ci ha botatu
E quellu ch’un ha buliutu
Dera sempre lu so contu
Senza falzu ritenutu
Dunque di la fratellanza
Da lu Vadu à lu Pianu
Serà lu piu bellu fiore
Per noi di ‘stu veranu
Ch’ellu ci averà datu
Nostru mere Capitanu
Noi l’uffrimu in cambiu
Un altru muscosu fiore :
Que’ di la ricunniscenza
Infrisgettatu d’amore ;
Coltu di manu allegra
U li purghjmu di côre.
Chi ‘stu fiore lu so’ muscu
Sperghj frà li cunsiglieri
Chi per salvanne la Petra
Anch’elli sò stati fieri
E seranu cu lu mere
I so’ saggi cundutteri.
Ch’ella ribombi la gioia
Per le valle d’acqua-d’orsu !
Ch’ellu sparisci lu bughiu
Di tuttu lu tempu scorsu !
E di Libertà lu maghiu
Piantemu à l’usu corsu !
Ô maghiu di la Libertà
Alza la cima altiera !
A lu ventu di prugressu
Si jôchi la to bandiera,
Oghie ti pianta la Petra
E sempre ne serà fiera !
Tu serai la so’ guida
In ogni occasione ;
Tu li ditterai sempre
Libera opinione
Per dassi bon’ servitori
Ed ella resta patrone !
V. G. d’Altimon
