07.7.1928 – 18.1.1933
17, 18, 19 Ghjennaghju 1933
LAMENTI DI VITTORIU GIANVITI SOPRA A SO FIGLIOLA
Di lu mille nove centu trenta tre
Fatale mi fù lu primu albore
Ne tengu la data punta in core
Chi alquantu lacrimosu fù per mè
Diciesette ghjennaghju quantu atroce !
Fu tutta la to notte d’agunia
Duve tantu suffri la mio Mimia
Cumu Cristu suffri sopra à la croce !
Si spinse lu diciottu appen’ entratu
E fù lu dicienove u funeratu
La mio Anghjula-Maria
Per quindi un n’ere fatta.
U mio core mi dicia :
« A la sorte la piu alta
Sera da Dio chjiamata
Chi la t’ha solu prestata.
Sol’in cura t’è cuncessa
Per un tempu bellu breve
Un anghjula cume quessa
Dio ripiglià la deve
Chi sta vita un n’è degna
Di cio ch’in lu celu regna »
Aiustava lu mio core
Dentumi quessu l’avvisu
« E stelle so di lu signore
E so pe’ lu Paradisu
Quelle chi, cume Mimia
Hanu tanta leggadria
Un n’è solu leggadria
Ch’ellu ci vorebbi a di.
Doni tanti ne avia
Da un podelli defini
Chè solu in breve detta
Er’un’anghjula cumpletta.
N’avia cu la presenza
Ogni gestu, lu candore,
Scintille d’intelligenza
E fiacula di lu core
Un li mancava che l’ale,
Ch’ella pussede avale.
Avale in Paradisu
Cu le so’ale collata
Sterà cu lu so’ surisu
D’anghjuli atturniata,
A la Madonna vicinu,
Accolta da lu Bambinu.
Dunque s’ell’è strappa côre
Di Mimia la staccanza
Avà deve di lu dolore
Piglia piezza la speranza,
Devemu li pienti tace,
Ben’è cio chi Dio face….
Quessa la vegu reale
Ma un possu ancu crede
Chi la to’ vita ô Mimi
Sia stata cusi breve.
Un n’hai ancu cinqu’anni,
Fior’appena moss’in pede !…
Sentu ben’ chi lu Signore
T’ha per Decretu Divinu
Chiamatu, la mio Mimia,
A scortanne lu Bambinu
Perche la Madonna vole
Chi tu li stie vicinu.
Ma allôra lu Bambinu,
La Madonna e lu Signore
Devu ancu ringrazià
Fanne giôia di dolore
E benedisce la manu
Chi m’ha spezzatu lu côre !…
Ghj’è quellu chi mi succede
Casu senza paragone.
A lu dolu di fà festa
Serebbi for’ di ragione
Ma jè cio ch’ellu si sente
Oghje lu mio core impone !…
Di dolu un si deve trattà
Postu ch’in Pietra risona,
Altu pienu d’allegria,
U sonu di la ciccona
E pe’ la festa, parata,
Mimi ghiè la to’ personna
Cu li to’ belli capelli,
D’anghjula lu bellu visu,
Le to’ belle mani junte,
Lu to’ serenu surisu,
Mi provanu chi tu ne si
Chiamata in Paradisu.
Dunque solu pe’ la Messa
Un ti vegu preparata.
In più di li to’ fratelli
Oghje serai scortata
Da lu to’ babbu e mamma
E la Petra cungregata.
Di ritornu da la chiesa
Ô quantu ci sera stantu
Di supportà la staccanza,
Vedeti passà accantu
A la nostra casa biôta
Per andà in campu santu !
Ma ti sapinu in celu
La mio Anghjula-Maria
E dinu chi t’averai
Una cara cumpagnia,
Quel’ di la mio mamma santa
E di la mio santa zia.
Averai ancu per cura,
Paterna prutezione,
Quella di ziu Milianu
U nostru caru zione
Chi ghjera di la famiglia
U pontellu d’unione.
Di lu vostru campu santu
Seraghju lu guerdianu
E l’orneraghju di fiori,
Mi solu di veranuMa sempre e tuttu l’annu,
E di la mio propria manu.
Stanne cunvit’e sicuru
Di quessa pô Leonerdu.
E quand’à stu bassu-mondu
Chiusu serà lu mio sguerdu
N’averanu mio figliôli
Cura cu stessu riguerdu
La nostra cara Mimia
A tutti prutezione
Ella ci derà in celu.
E la benedizione
Per noi porà ottene
In cu l’assuluzione
Per noi, in Paradisu
Un anghjula cume ella
Serà di la nostra vita
Una luccichente stella
E ci guiderà d’Eternu
In la trada la piu bella.
Avale so ghjunt’ in piezza
Lu prete cu la bandiera.
Tutta la Petra ô Mimi
Aspetta per fatti schiera
E la ciccona ci chiama
A la chiesa pe’ preghera
Lu to’ passucciu distintu
Un porai piu approdà,
Manu à li to’ fratelli
Un li ne porai piu dà
Allora quattru zitelle
Da qui ti volenu portà.
Andemuci ancu cusi
Chi la vole lu Signore.
Lacrime un n’aimu più
Seccu sentimu lu côre
Sera sfocu cunsumatu
Ma ci resta lu dolore.
Dolore nun basta a di,
U termine jè disperu.
Di la vita un vegu piu
Che roba tinta di neru
E di ragiunghje à Mimia
Ghj’è solu lu mio penseru.
Ma aspettendu ‘su jornu
Quindi, lu spirtu errente,
La mio Anghjula-Maria
Mi sera sempre presente,
Sempre la so’ cara voce
Eio crideraghju sente
Aiô chi lu mondu aspetta.
U coraggiu l’averemu
Di rinchiude stu tesoru
Ma lu ci ripigleremu,
Ci’ aprerà lu Paradisu
Duve sempre l’averemu.
par 