par O dulcissimu cantu di l’estate,
Suave o lentu, lindu o maestosu ;
Voli cun l’olezzu d’e tanfate
Chì passanu in lu celu luminosu ;
Sguilli lieve, cume un passu di fate
Guasi in silenziu, callu, voluttuosu
Bagni tutte le cose insonnulate
In soffiu longu, lassu e deliziosu…
Colli da l’onde e fali da le stelle ;
In le cime, li boschi, e vallicelle,
Simile a mele cola’ languidezza…
L’ale piegate e l’ochji mezi chiosi
Zeculata da si soni cunfusi,
Sogna di basgi l’alma, in la stanchezza
G. di a Grotta (1926)
